លោកឧត្តមសេនីយ៍ទោ ឈឿន សុចិត្ត បានដឹកនាំកងកម្លាំងចូលរួមគោរពវិញ្ញាណក្ខន្ធសពនាយនគរបាលចំនួន 2 រូបដែលបានស្លាប់ក្នុងពេលបំពេញភារកិច្ច។
នៅល្ងាចថ្ងៃព្រហស្បតិ៍ ទី21 ខែមេសា ឆ្នាំ2022នេះ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានដឹកនាំលោកស្នងការរង លោកនាយការិយាល័យ លោកអធិការនគរបាល និងមន្ត្រីក្រោមឱវាទ ចូលរួមគោរពវិញ្ញាណក្ខន្ឋ និងនាំយកថវិការបស់ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ចំនួន 5,000,000 រៀល ចូលបច្ច័យ សពលោកវរសេនីយ៍ត្រី ជុច សុភា នាយប៉ុស្តិ៍នគរបាលរដ្ឋបាលទួលព្រេជ និងលោកអនុសេនីយ៍ទោ រឹម សុផាណា មន្ត្រីនៃអធិការដ្ឋាននគរបាលស្រុកអង្គស្នួល ដែលបានពលីជីវិតក្នុងការបង្ក្រាបបទល្មើសគ្រឿងញៀន នៅឃុំទួលព្រេជ ស្រុកអង្គស្នួល ខេត្តកណ្តាល។
សូមបញ្ជាក់ផងដែរថា កាលពីមកវេលាម៉ោង 10 និង 30 នាទីព្រឹកថ្ងៃទី 21 ខែមេសាឆ្នាំ 2022 នេះ នៅចំណុចដីវាល ស្ថិតក្នុងភូមិចន្ទ្រា ឃុំទួលព្រេជ ស្រុកអង្គស្នួល ខេត្តកណ្ដាល ខណៈកងកម្លាំងប៉ូលីសកំពុងចុះបង្ក្រាបករណីគ្រឿងញៀនស្រាប់តែពួកជនល្មើសដែលប្រដាប់ដោយអាវុធបានបាញ់ស្រោចមកលើមន្ត្រីប៉ូលិសបណ្ដាលឲ្យមន្ត្រីប៉ូលិសស្រុកអង្គស្នួលចំនួន 2 នាក់បានបាត់បង់ជីវិតហើយបានឃាត់ជនសង្ស័យចំនួន 2 នាក់ ភេទប្រុស និងរឹបអូសបានវត្ថុតាងមួយចំនួន។
បច្ចុប្បន្ន សពលោកវរសេនីយ៍ត្រី ជុច សុភា ត្រូវបានក្រុមគ្រួសារធ្វើបុណ្យតាមបែបប្រពៃណីនិងតាមគន្លងពុទ្ធសាសនា នៅគេហដ្ឋាននៃសពស្ថិតភូមិឈើបួន ឃុំម្កាក់ ស្រុកអង្គស្នួល ខេត្តកណ្តាល ចំណែកសពលោកអនុសេនីយ៍ទោ រឹម សុផាន់ណា ត្រូវបានក្រុមគ្រួសារធ្វើបុណ្យទៅតាមប្រពៃណីនិងតាមគន្លងពុទ្ធសាសនា នៅគេហដ្ឋាននៃសពស្ថិតក្នុងភូមិអង្គស្នួលទី 3 ឃុំពើក ស្រុកអង្គស្នួល ខេត្តកណ្ដាល។
