ភ្នំពេញ នៅព្រឹកថ្ងៃទី 8 ខែមេសា ឆ្នាំ 2022 នេះ ឯកឧត្តម សៅ សុខា អនុញ្ញាតឱ្យអនុព័ន្ធយោធា ចិន ទើបតែងតាំងថ្មីចូលជួបសម្តែងការគួរសមនិងជូនពរឆ្នាំថ្មី។
ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលផ្ទៃប្រទេស បានអនុញ្ញាតឱ្យលោក វរសេនីយ៍ឯកពិសេសលោក ថាំង ហាវ ប្រធានការិយាល័យអនុព័ន្ធយោធាចិន ដែលទើបតែងតាំងថ្មី និងសហការី ចូលជួបសម្ដែងការគួរសម និងជូនពរឆ្នាំថ្មីប្រពៃណីជាតិខ្មែរ ដែលនឹងមកដល់នាពេលខាងមុខនេះ។
នៅក្នុងឱកាសនោះ វរសេនីយ៍ឯកពិសេស លោក ថាំង ហាវ បានថ្លែងអំណរគុណចំពោះនាយឧត្តមសេនីយ៍ មេបញ្ជាការ ដែលបានអនុញ្ញាតឲ្យរូបលោកនិងសហការី បានចូលជួបសម្តែងការគួរសមនាពេលនេះ ព្រមទាំងបានលើកបង្ហាញពីចំណងទាក់ទងមិត្តភាពជាប្រពៃណី រវាងប្រទេសទាំង2ដែលមានជាយូរលង់ណាស់មកហើយ។
វរសេនីយ៍ឯកពិសេស បញ្ជាក់ថា ក្រោមការដឹកនាំរបស់នាយឧត្តមសេនីយ៍មេបញ្ជាការ លោកនឹងខិតខំអស់ពីលទ្ធភាព ដើម្បីបន្តពូនជ្រុំចំណងមិត្តភាព សាមគ្គីភាព និងកិច្ចសហប្រតិបត្តិការដែលមានស្រាប់ ឲ្យកាន់តែរឹងមាំនិងរីកចម្រើនថែមទៀត។
ជាការឆ្លើយតប ឯកឧត្តម នាយឧត្តមសេនីយ៍ សៅ សុខា បានសម្តែងនូវការស្វាគមន៍និងអបអរសាទរចំពោះវរសេនីយ៍ឯកពិសេស ដែលបានមកបំពេញបេសកកម្មការទូតនៅកម្ពុជា ហើយតាមរយៈបេសកកម្មនេះកងទ័ពប្រទេសទាំង2នឹងបន្តពង្រឹងពង្រីកចំណងទាក់ទងមិត្តភាព កិច្ចសហប្រតិបត្តិការកាន់តែស្អិតរមួតថែមទៀត ចំណងមិត្តភាពជាប្រពៃណី កម្ពុជា-ចិន ត្រូវបានពង្រឹងពង្រីកកាន់តែស៊ីជម្រៅលើគ្រប់វិស័យ រហូតឈានដល់កិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយ និងជាមិត្តដែកថែបមិនអាចបំបែកបាន។
ឯកឧត្តម នាយឧត្តមសេនីយ៍ បានលើកឡើងពីភាពជោគជ័យរបស់កម្ពុជាលើការទប់ស្កាត់ការឆ្លងរាលដាលជំងឺកូវីដ19 ដែលជាកត្តាជោគជ័យនេះបានដោយមានការដឹកនាំដ៏ឈ្លាសវៃរបស់សម្តេចតេជោ ប្រមុខរាជរដ្ឋាភិបាល, ការចូលរួមពីមន្ត្រីរាជការ ប្រជាពលរដ្ឋ និងការជួយឧបត្ថម្ភគាំទ្រពីបណ្តាប្រទេសជាមិត្ត រួមនឹងអង្គការសុខភាពពិភពលោកផងដែរ។
លើកិច្ចសហការរវាងកងទ័ពប្រទេសទាំង2 ឯកឧត្តម នាយឧត្តមសេនីយ៍ បានថ្លែងអំណរគុណដល់កងទ័ពរំដោះប្រជាជនចិន ដែលកន្លងមកក៏ដូចជាបច្ចុប្បន្នតែងបានឧបត្ថម្ភគាំទ្រធំធេងដល់កងរាជអាវុធហត្ថ ពិសេសលើការបណ្ដុះបណ្ដាលធនធានមនុស្ស។
